حوار بين جده وحفيدتها

حوار بين جدة وحفيدتها عام 2100 المكان أحد أحياء القاهرة
الزمان يوم من أيام صيف عام 2100

حفيدة في سن المراهقة (12 سنوات) تجلس مع جدتها (70 سنة) ويدور بينهما هذا الحوار:

الحفيدة: تيته ميرو إزيك..بقى لي زمان ما قعدتش معاكي
الجدة: وهو أنا عارفة أتلم عليكي خالص.. ده أنا قاعدة زهقانة قوي ومش لاقية حاجة تسليني
الحفيدة: ومابتفتحيش الدش ليه يا تيته
الجدة: التليفزيون بقى ممل خالص مافيهوش غير 9700 محطة بس!.وأنا كمان ما بعرفش أغير المحطات!
الحفيدة: وإيه الحلاوة دي؟ حلو البادي اللي انتي لابساه ده..بس ده موضة قديمة قوي ياتيته !
الجدة : يا بنتي أنا ست دقة قديمة وبالبس زي ما جيلنا الصاعد اتعود وحسب التقاليد القديمة بتاعتنا
الحفيدة : أيوه بس مش حاسة إنك مخنوقة وانتي لابساه؟
الجدة: أبداً ده هو ده اللبس المحتشم اللي مفروض الكل يلبسه ويحافظ عليه..فين أيام زمان لما كنا نلبس البادي اللي مبين البطن والظهر بس، مع البنطلون السترتش الجلد …كانت حاجة آخر روشنة
الحفيدة : ياه يا تيته.. ده انتوا كان ليكم تقاليد غريبة خالص !
الجدة : وهو انتي فاكرة إن أيامكم دي أيام؟ يا بنتي أيامكم دي ما يعلم بيها إلا ربنا .. فين أيام سنة 2020، هي الواحدة فينا كانت تستجري تشرب سيجارة البانجو ولا تسحب لها سطر بودرة قدام أبوها؟ طب ده الدنيا كانت تتقلب ساعتها وما تتعدلش .. أمال إيه .. كان فيه حاجة اسمها أخلاق
الحفيدة: معقول يا تيته؟ للدرجة الفظيعة دي!!؟
الجدة: أمال انتي فاكرة إيه .. وبعدين كانت الست من دول ما تلبسش اللبس الخليع بتاع اليومين دول..يعني الجيبة كان ما يقلش طولها عن شبر وربع .. وكانوا الستات يلبسوا فوقيها بلوزة باستمرار ..مش زي دلوقتي! حسبي الله ونعم الوكيل!
الحفيدة : يا خبر .. وإيه كمان ياتيته
الجدة: ح أقول لك إيه ولا إيه يعني خدي عندك مثلاً .. زمان كنا نسمع الطرب الأصيل لمطربين حقيقيين زي مصطفى قمر وعمرو دياب وطبعاً كانت سيدة الغناء "شاكيرا"، وكانت الأغنية مدتها أكثر من دقيقتين متواصلين من الطرب الأصيل والموسيقى الهادية الراسية اللي تعمر النافوخ بصحيح كانوا مطربين روشين وآخر طحن، حسبي الله ونعم الوكيل!
الحفيدة : وبعدين ياتيته
الجدة : وبعدين كنا نسمع على حاجة اسمها اسطوانات ليزر، ودي صحيح انقرضت، بس كان ليها طعم عن دلوقتي، يا سلام لما كنا نحطها في الووكمان ونعلقها في حزام البنطلون كده ونمشي في الشارع كده، كانت أيام جميلة. حسبي الله ونعم الوكيل!
الحفيدة : حكاويكى ممتعة قوي يا تيته .. ثانية واحدة بس لما أصحي سمسم صاحبي فى المدرسة لأنه بايت معايا في الأودة من امبارح ..أصل الإنسان الآلي بتاع الصحيان بايظ ولازم نصلحه النهاردة
الجدة: طيب ياحبيبتي روحي
(بعد عدة دقائق)
الحفيدة: هيه يا تيته.. وبعدين
الجدة : أحلى أيام بقى كانت أيام الدراسة، الفصل كان على أيامنا رايق وعدد التلاميذ فيه ما يزيدش عن ستين سبعين تلميذة، وكنا ساعتها بنعرف نفهم الدرس كويس مش زي دلوقتي، وكانت الشوارع أيامها فاضية يعني كانت إشارة المرور تقعد ساعة إلا ربع بس لأن مصر كلها كان تعدادها 70 مليون مش أكثر، تخيلي بقى الروقان اللي كنا فيه؟ حسبي الله ونعم الوكيل!
الحفيدة : 70 مليون بس؟
!!الجدة : أمال إيه .. عشان كده كانت كل حاجة رخيصة ، يعني مثلاً كيلو اللحمة يوم ما يضربه الدم كان يبقى بخمسة وعشرين جنيه أو بتلاتين جنيه، وكان أتخن جوز جزمة بـ 250 جنيه، وكان الواحد يقدر يشتري شقة تمليك بـ 150 ألف جنيه بس..وكان الدولار بخمسة جنيه بس تخيلي بقى؟
الحفيدة : ما هو علشان كده الجواز على أيامكم كان سهل خالص، إحنا بقى خلصنا من العُقد دي
الجدة : أُمال إيه .. ده احنا الواحدة مننا كانت بمجرد ما توصل سن 17 سنة تبتدي تفكر في الجواز العرفى على طول، وما كانش عندنا الأفكار الغريبة اللي بتعملوها دلوقتي، أنا شخصياً شايفة إن ده أوفر شوية، ده احنا يا بنتي على أيامنا كان لا يمكن البنت تتأخر بره البيت عن الساعة أربعة صباحاً، طب ده باباها كان ممكن ساعتها يخاصمها !
الحفيدة : ياي! ده انتوا كنتوا متزمدين خالص ياتيته !!!
الجدة : يا بنتي إحنا اتربينا على الأخلاق والفضيلة والعادات والتقاليد . يعنى كان أهل الفن محتشمين جداً وكانوا دايماً يطلعوا بالمايوهات البيكيني، والمذيعات كانوا يقعدوا جنب الضيف مش على ركبته زي دلوقتي.. هيـ يـ يـ يـ ـه الله يرحم دي أيام.. فكرتيني بالذي مضى حبي الله ونعم الوكيل!
(تمسك الجدة بتليفون محمول في حجم علبة الكبريت)
الحفيدة : ح تكلمي مين يا تيته
الجدة : الحقيقة أنا كنت موصية الجزار على اتنين كيلو لحمة و اديته 600 دولار عربون وعايزة أطلبه أشوف إذا كانت اللحمة وصلت ولا لأ ..
الحفيدة: (تنهض من مكانها) تشاو سي يو تيته!
الجدة: سي يو
وبعد مرور عدة ساعات انتابت الجدة خلالها غيبوبة بسبب الشيخوخة
و في المساء دار هذا الحوار بين الجدة والحفيدة:
الجدة: إنتي كنتي فين يا فتفت؟
الحفيدة :أصل إحنا أخدنا الولد من الحضانة ..
الجدة : ولد !! ولد إيه اللي أخدتوه من الحضانة؟
الحفيدة : آه صحيح أنا نسيت أقول لك .. أصل أنا جبت ولد من سمسم صاحبي
الجدة: يا بنتي مستعجلين على إيه مش لما تتجوزوا ؟ حسبي الله ونعم الوكيل!
الحفيدة : يا سلام عليكي يا تيته.. إنتي عليك تحكمات غريبة..طيب إيه اللي يمنع نخلف من غير جواز أنا شخصياً عملتها ونفعت
الجدة : مشكلتي إني ما بعرفش أزعل منك يا فتفت يا عكروتة ..وسميتوا المحروس إيه بقى
الحفيدة : سميناه (دوت كوم) ..
الجدة : نعم . دوت كوم؟ نظام هاي تك بقى؟ يعني لما تعوزي تنادي له تدوسي (إنتر) ولا إيه بالضبط ؟
الحفيدة : ها ها ها ها .. إيه الخفة دي يا تيته .. والله فكرة .. لما أعوز أنده له أدوس إنتر .. ولما أحب أقول له روح أودتك أدوس (ألت و إف4)
الجدة: وأخدتوه من الحضانة وديتوه فين بقى؟
الحفيدة : وديناه النادي الصهيوني بتاع الحي
الجدة : النادي الصهيوني بتاع الحي؟
الحفيدة : أيوه .. ده نادي جميل معمول برعاية كبار رجال الأعمال .. وتحت رعاية وزارة الزراعة وده بيعلم الأطفال حاجات ظريفة خالص ومصاريفه رخيصة جداً وبعدين الولد الكويس ممكن يبعتوه يكمل تعليمه في إسرائيل على نفقة وزارة الزراعة أصل (ميدو يوسف والي) وزير الزراعة ده راجل متفتح قوي. هه، أفتح لك التليفزيون يا تيته عشان تشوفي نشرة الأخبار
الحفيدة تضغط الريموت كنترول لنرى شاشة كبيرة بطول وعرض حائط الغرفة، وتظهر صوت مذيعة مصحوبا بلقطات للأنباء تقول:
المذيعة : هاي شلة! إليكم عناوينالااخبار
- أمريكا ترصد 25 مليار دولار لرأس تامر بن محمد بن أسامة بن لادن المتهم الأول في تفجير قصر السفير الأمريكي في أفغانستان
- واشنطن تتهم ليبيا بتفجير سفينة فضاء فوق كوكب المريخ
- وزير الاقتصاد د. فريد يوسف بطرس غالي يصرح: إعدام الفقراء هو الحل لخروجنا من عنق الزجاجة
- موافقة مجلس الشعب أخيرا على خصخصة معبد الكرنك
أخبار عربية:
- زهوة ياسر عرفات تطالب بانسحاب إسرائيل حتى حدود عام 2030، وإعلان الدولة الفلسطينية في مايو المقبل
- سيريلانكا والفلبين تطرد خمسة آلاف خادمة كويتية
- إسرائيل ترفض الإنسحاب من البصرة إلا بعد ضمان أمن مستوطناتها في بغداد
- اشتباكات على الحدود الإسرائيلية المغربية
أخبار الفن
- زفاف المطربة صباح على حفيد الفنان الراحل راغب علامة
- رئيس قطاع الإنتاج لم يستقر بعد على بطلة فوازير رمضان ويعقد إجتماع مع السيدة توتي محمد صفوت
الشريف وزيرة الإعلام الجديدة لمناقشة هذه القضية
- الفنان محمد هنيدي يهاجم نجوم الكوميديا الجدد
المذيعة: فينيش باي
الجدة: لأ بقى حسبي الله ونعم الوكيل فيكم فعلا! (يغمى عليها)
الحفيدة : تيته..تيته!!

هههههههههههههههههه
فعلا ربنا يستر

وتكملة لباقى النشرة الجميلة دى

خدى بقى نشرة التاسعة

1-اعرب الرئيس جمال مبارك عن سعادته بثقة الشعب وانتخابه لفترة رئاسية خامسة على التوالى واعرب عن أسفه لوفاة جميع منافسيه قضائا وقدرا قبل الانتخابات بعدة ايام والبقاء لله ...

2- قرر سيادة الرئيس البقاء على الوزارة الحالية والتي رافقته منذ توليه الحكم دون تغيير وذلك لأدائها المشرف فى الفترة السابقة وللحفاظ على الإستقرار فى البلاد ...

3- تلقى سيادته اتصالا هاتفيا من بينج بونج يع رئيس جمهورية الصين الشعبية.. القوة العظمى.. تباحثا خلاله فى القضايا الهامة فى المنطقة وتلقى وعدا من بينج بمحاولة الضغط على اسرائيل للعودة لحدود عام 2040.. ومن ناحيته وعد الرئيس مبارك الحفيد ببذل جهود اكبر لمنع تهريب الحجارة للفلسطينين عبر الحدود المصرية ...

*******
فاصل قصير لتهدئة اعصاب السادة المشاهدين نستمع خلاله لأغنية العنب العنب للفنان العندليب القدير الراحل سعد الصغير ...
*******
عدنا اليكم
*******

4-اعرب سيادة الرئيس عن أسفه لغرق العبارة السلام 10098 وابلغ الجهات المختصة عن قلقة لتزايد اعداد العبارات الغارقة وأمر سيادته بتشكيل لجنة اساسية تنبثق منها لجان فرعية تتشكل من كافة الجهات المعنيه للبحث عن السر الغامض فى كثرة هذه الحوادث وامر بصرف ربع جنيه تعويضا لاسرة كل متوفى بعد ان تدفع كل اسرة الرسوم المطلوبة منها و تقدر بحوالي 113 جنيه مصري فقط لا غير ...

5-ألقت مباحث القاهرة القبض على طفل فى المناطق الشعبية وبحوذته قطعة شوكولاته تطبيقا لقانون من أين لك هذا.. وبعد البحث والتحري واستجواب جميع افراد العائلة والجيران تبين ان الطفل قد تسلل ليلا عبر الاسلاك الشائكة الى احدى المناطق الراقية ووجد القطعة ملقاة على الارض.. وقد قامت النيابة بحجز الطفل والاب 45 شهر على ذمة التحقيق لمعرفه كيف تمكن الطفل من اجتياز جميع الحواجز الفاصلة بين المناطق الشعبية والراقية
وقد اعربت جمعية حقوق الاثرياء عن قلقها من هذا الحادث وطالبت وزير الداخلية بالتحقيق فى هذا الاهمال الذى يمكن ان يعرض امنهم للخطر ...

6-اعرب وزير الصحة عن تفائله لانخفاض حالات الانتحار هذا الشهر الى عدد تسعة الاف حالة يوميا بعد ان بلغت الشهر الماضي عشرة الاف حاله يوميا.. ومازالت أسباب الانتحار غامضة ...

7-قررت لجنة مختصة بإستمرار الحفر في قناة توشكى غصب عن عين اهل الشعب تطبيقا لوصايا الجد الاكبر والتى احلها محل الدستور المصرى فى عام 2030( ده الاعلان الرسمى قبل كده كان نفس النظام مطبق ولكن بالفهلوة ) ...

8-الرئيس مبارك الحفيد يعلن عن وضع خطة خمسية للقضاء على البطالة استكمالا لمجهودات الرئيس مبارك التي بدأها في الثمانينات ...

9- فاز منتخبنا القومي على نظيره الجزائري ليتأهل الي تصفيات كأس العالم و نتمنى التوفيق للمنتخب القومي بعد ان ابتعد عن بطولة كأس العالم منذ 1990 ...

10-افتتح اليوم وزير الصحة المستشفى رقم 100251 للامراض النفسية والعصبية بطاقة استيعابيه تقدر بـ 10000 مريض واعرب عن أمله في جمع المزيد من التبرعات لبناء المزيد من المستشفيات من هذا النوع لاستيعاب الاعداد المتزايده من المرضى.. وايضا ما زالت الأسباب مجهولة لانتشار الأمراض النفسية والعصبية مثلها مثل حالات الانتحار ...

ههههههههههههههههههههههههههههههههههههههههههه

لا بجد جاااااااااااااامد جداااااااااااااااا بس دة لو حصل يبقى علية العوض ومنة العوض ربنا بس يدينا طولة العمر حوار بين جده وحفيدتها 93428

ههههههههههههههههههههههههههههههههههههههههههههه تكرم يا عواد وشكرا على الاضافه بس يارب لا الموضوع يتحقق ولا اللاضافه بتاعتك دى تتحقق

[img][/img]

[quote="eso0o"]ههههههههههههههههههههههههههههههههههههههههههه

لا بجد جاااااااااااااامد جداااااااااااااااا بس دة لو حصل يبقى علية العوض ومنة العوض ربنا بس يدينا طولة العمر حوار بين جده وحفيدتها 93428

[/quote

على رايك يا ايسو لو حصل يبقى عليه العوض
بس لا يا سيدى يعطيك انت طولة العمر ماتتكلمش بالجمع ربنا ما يحكمش علينا نشوف ده ابدا اه ويعطى بابا حسنى كمان طولةالعمر قول امين